chal chodh na yaar

Maaf kiya is jahaan ko
Waise bhi yahaan saga kaun
Cheekne pe jab kisi ne na suna
Toh ab rehne do mujhe maun

Kyun puchte hai log ki kya hua
Jab kisi ko bhi faraq nahin padhta
Baatein koi sunna chahata nahin
Magar na batane pe har koi jhagadhta

Kabhi kabhi jab bolta hun toh sochta hun
Kya choti baton ko badha toh nahin raha?
Kya saamne wale zabardasti hain baithe?
Jitna bol raha hun, maine sach mein saha?

Log kahin thak na jaayein mujhse
Ki yeh toh humesha dukhi hi rehta
Baat karna chodh de ya dur ho jaaye
Yahi soch ke main kuch nahin kehta

Upar se har kisi ki apni ladhai
Unhe zarurat nahin mere bojh ki
Ab pata nahin yeh sab sach bhi hai
Ya kuch galti hai mere soch ki

Isliye chehere pe ek hasi chipkadi
Kuch bhi bolne se pehle main hun rukta
Kyunki agar koi meri baat sunke bhi na sune
Usse zyada mera dil nahin dukht

Leave a Reply

Your email address will not be published.