ഉണരാത്തൊരു നിദ്ര

By Resmi Radhakrishnan

അംബര ചുംബികൾക്കിടയി-

ലൊന്നിലെ പത്താം നിലയിൽ

ധ്വാന്തം തൻ അടവിയിൽ

ശരശയ്യയിൽ ഏകയായ്

നിദ്ര തേടി അലയുന്ന കണ്ണുകൾ.

ഖേദത്താലൊരു ഖില-

മായി തീർന്നൊരെൻ മനം,

ചിന്തകൾ അതിരുകൾ താണ്ടി

അപ്പുറത്തേക്കൊഴുകി അകലുമ്പോൾ

നിദ്രാദേവി തൻ കടാക്ഷമേൽക്കാ-

തിന്നും നിസ്സഹായയായി

കണ്ണും നട്ടിരിക്കുന്നു ഞാനാ

മുകൾഭിത്തിയിൽ..,

എൻ ഭാവനയിൽ തീർത്ത

നക്ഷത്രക്കൂട്ടങ്ങളിൽ !

തരണി തൻ ഉദയത്തിലും

ജീവച്ഛവം കണക്കെ ഞാൻ

ഉണരാത്തൊരു നിദ്ര തേടി.

By Resmi Radhakrishnan